DC MURAGILI AAGIZA KUONGEZA KASI YA UJENZI WA SHULE YA SEKONDARI SILOKA.

Imewekwa: August 22nd, 2024

Mkuu wa Wilaya ya Bukombe Mhandisi Paskasi Muragili ameagiza kumalizika haraka kwa Mradi wa Ujenzi wa Vyumba 16 vya Madarasa pamoja na Matundu 16 ya Vyoo katika Shule ya Sekondari Siloka wenye thamani ya Milioni 428. 8

Muragili ameyasema hayo tarehe 22 Agosti, 2024 alipokuwa akitembelea Miradi huo uliopo katika Kata ya Uyovu ikiwa ni moja ya sehemu ya Ziara zake Katika Katika Kata mbalimbali.

“Jitahidini sana ujenzi huu wa madarasa na matundu ya vyoo umalizike kwa haraka na ubora uliokusudiwa kwasababu tunatarajia mwakani wanafunzi wa kidato cha nne waanze kusoma shuleni hapa”.

Aidha Muragili amewaagiza Maafisa elimu kuhakikisha wanafunzi wote wanaomaliza darasa la Saba mwaka huu wanachukuliwa taarifa zao zote.

“Naomba wanafunzi wote ambao wanamaliza elimu yao ya msingi mwaka huu wachukuliwe taarifa zao zote kuanzia majina ya wazazi wao au walezi, namba zao za simu pamoja na taarifa za makazi yao ili kuweza kuwapata kwa haraka endapo watashindwa kuripoti Shuleni mwakani”.

Pia Mhe. Muragili ametembelea Mradi wa maji Kanembwa na kuwapongeza RUWASA kwa kusimamia vizuri mradi huo.

“ nipende kuwapongeza sana RUWASA kwa kazi hii nzuri, hivi ndivyo Serikali inataka juu ya wananchi wake, mmewajibika vizuri na siku zote mtu akifanya vizuri ni haki yake kupongezwa hivyo hongereni sana”.

Muragili alihitimisha Ziara yake katika Kata hiyo kwa kufanya Mkutano wa hadhara na wananchi wa Kijiji cha Kabuhima ambapo alisikiliza na kutatua Kero zao.