DC Nkumba aishukuru Benki ya NMB

Imewekwa: August 29th, 2020

Mkuu wa Wilaya ya Bukombe Mhe.Said Nkumba ameishukuru Benki ya NMB kwa kutoa mabati 200 kwa ajili ya uezekaji wa madarasa mawili katika shule ya msingi Azimio, vitanda 5 vya kulalia wagonjwa, vitanda viwili vya kujifungulia akinamama, mashuka 20 pamoja na vifaa vya usafi katika kituo cha afya Ushirombo vyenye thamani ya shilingi milioni 10,000,000/=.

“Tunaishukuru Benki ya NMB kwa namna ambavyo imeweza kutimiza ahadi na imeendelea kuiunga mkono serikali na kuwashika mkono wananchi. kiujumla unaweza ukaomba usipewe, Sisi tumeomba na tumepewa, tunashukuru sana sana kwa msaada kubwa mliotupatia.”

Shukrani hizo amezitoa tarehe 28 Agosti, 2020 wakati  akikabidhiwa vifaa hivyo katika shule Msingi Azimio.

Meneja wa NMB kanda ya Magharibi Sospeter Magese amemtaka Mkurugenzi Mtendaji kuhakikisha anaendelea kuomba misaada katika Benki ya NMB hasa katika sekta ya elimu na afya.

”Mkurugenzi Mtendaji  endelea kuomba misaada hasa kwenye sekta ya elimu na afya  sisi tupo tayari kushiriki kwenye shughuli za maendeleo”

Magese amewaomba wananchi wa Wilaya ya Bukombe kuhakikisha wanaitumia Benki ya NMB ili iweze kuleta maendeleo makubwa ndani ya Wilaya.

Naye Makamu Mkuu wa Shule ya Msingi Azimio Adolf Shida ameishukuru benki ya NMB kwa kutatua changamoto ya mrundikano wa wanafunzi madarasani.

“Tunawashukuru sana wadau wetu wa maendeleo  kwa kutupatia jumla ya mabati 200. Msaada huu utatusaidia sana katika kupunguza changamoto ya mrundikano wa wanafunzi madarasani”

Aidha shija amewaomba wadau wengine wa maendeleo waige mfano wa NMB ili kuendelea kuunga mkono juhudi za serikali za kuwaletea wananchi maendeleo.

Benki ya NMB ni mdau mzuri wa maendeleo kwani inahakikisha kila mwaka inatenga asilimia moja ya faida yake na kupeleka kwenye sekta ya elimu na afya.

Mkuu wa Wilaya ya Bukombe  Mhe. Said Nkumba akikabidhiwa vifaa vya usafi  vya kituo cha afya Ushirombo na Sospeter Magesse Meneja NMB kanda ya Magharibi.

.

Mkuu wa Wilaya ya Bukombe  Mhe. Said Nkumba akikabidhiwa mabati 200 ya shule ya msingi Azimio  na Sospeter Magesse Meneja NMB kanda ya Magharibi..

Mkuu wa Wilaya ya Bukombe  Mhe. Said Nkumba akikabidhiwa mashuka 20 ya kituo cha afya Ushirombo na Sospeter Magesse Meneja NMB kanda ya Magharibi.