Fedha za RBF kujenga njia za kuunganisha wodi

Imewekwa: July 13th, 2020

Mkurugenzi Mtendaji wa Halmashauri ya Wilaya ya Bukombe Dionis Myinga amemtaka Dr. Range Nyamhanga kwa niaba ya Mganga mkuu wa Wilaya kuhakikisha fedha za Malipo kwa Ufanisi (RBF) zitakazoingia kuanzia sasa zinatumika kumalizia ujenzi wa njia ya kupita kuunganisha wodi na wodi ( Walkway) zilizobaki baada baadhi ya njia kujengwa na kukamilika.

“Mganga Mkuu hakikisha unatenga fedha za RBF kwa ajili ya kumalizia njia ya kuunganisha Wodi ya Mama na Mtoto, Chumba cha Kuhifadhia Mahiti na Jengo la tiba na Matunzo”

Myinga ameyasema hayo alipofanya ziara ya kutembelea kituo hicho kwa ajili ya kukagua ujenzi wa njia pamoja na ujenzi wa Duka la dawa katika kituo cha afya Uyovu tarehe 13 Julai, 2020.

Aidha amemtaka Mhandisi wa Ujenzi Neema Makala kusimamia ujenzi wa Duka la dawa kwa viwango vilichokusudiwa na kuhakikisha duka hilo linakamilika kwa wakati ili wananchi waweze kupata huduma ya upatikanaji wa dawa kwa urahisi na kwa gharama nafuu.

Mhandisi wa Ujenzi Neema Makala amemuahidi Mkurugenzi Mtendaji kuwa miradi yote inayotekelezwa itakamilika kwa muda uliopangwa japokuwa wanakabiliwa na changamoto ya upungufu wa wataalamu katika Idara ya ujenzi.

Pia amewapongeza wasimamimizi wa miradi hiyo kwa kusimamiam vizuri miradi na kuhakikisha fedha za serikali zinatumika kwa lengo lililokusudiwa pamoja na kufuata miongozo iliyotolewa.

Mpaka sasa jumla ya kiasi cha shilingi 41,000,000/= za mfuko wa Pamoja wa Afya HSBF) katika kituo cha afya Uyovu kwa ajili ya kuboresha huduma za afya Wilayani Bukombe zimetumika kujenga njia ya kuunganisha wodi ya wazazi,Wodi ya watoto, jengo la upasuaji na Maabara yenye urefu wa mita 139.4.

Hata hivyo Mkurugenzi Mtendaji alitembelea na kukagua miradi mingine ikiwemo Ujenzi wa nyumba ya mtumishi (two in one) katika Zahanati ya Ikuzi, Ujenzi wa vyumba viwili vya madarasa na ofisi moja ya walimu katika shule ya Msingi Ikuzi, Ujenzi wa kituo cha afya Uyovu na ujenzi wa matundu 17 ya vyoo katika shule ya Msingi Nasiluluma.