TAS - Bukombe yafanya kikao cha kimkakati

Imewekwa: September 22nd, 2018

Chama cha watu mwenye Ualbino Tanzania (TAS) chini ya mradi jumuishi wa watu wenye ualbino unaotekelezwa na shirika lisilo la kiserikali la Lilliane Foundation kimefanya kikao cha kimkakati  katika ukumbi wa mikutano wa makuti Wilayani Bukombe kwa ajili ya kujadili mipango itakayowezesha  upatikanaji wa huduma bora za bima ya afya (CHF), mpango wa kunusuru kaya maskini (TASAF) unavyoendeshwa, upatikanaji wa mikopo kutoka Halmashauri na utoaji wa elimu kwa watu wenye ualbino katika shule za serikali na za watu binafsi.

Akifungua  kikao hicho Mwenyekiti wa TAS Ndg. Ida Saka ameomba ushirikiano  wakutosha kutoka kwa wataalamu wa Halmashauri  ya Wilaya ya Bukombe ili waweze kufanya kazi na kufikia malengo ya mradi yaliyokusudiwa ikiwa ni kupata ufahamu na kujadili  namna ambavyo watu wenye ualbino watakavyoweza kunufaika.

Naye Mratibu wa mfuko wa bima ya afya ya msingi (CHF) Ndg.  Revocatus F. Nyamweni amewaomba walemavu wa ngozi kuhakikisha wanajiunga na  mfuko wa bima ya afya ya jamii (CHF)  ili kuwa na uhakika wa matibabu pale wanapougua na kuongeza wingi wa upatikanaji wa huduma za afya, Nyamweni amesema hayo wakati akiwasilisha mada ya mfuko wa bima ya afya ya jamii (CHF) kwa wajumbe wa kikao hicho.

Aidha  Mratibu wa  mpango wa kunusuru kaya maskini (TASAF)  Ndg. Prisca M.Lyimo amesema mradi wa TASAF umelenga kuziwezesha kaya maskini  sana kwa watu wote wenye ualbino na wasio albino. Pia mradi  unatoa elimu kwa walengwa namna bora ya kutumia fedha wanazowezeshwa ili kujikwamua kiuchumi. "Mradi wa kunusuru kaya maskini ni wa watu wote kutoka kaya maskini  sana bila kuangalia familia hizo kama zina ulemavu wa ngozi" 

Ndg. Vumilfa Mchwapaka ametoa ushauri kwa watu wenye ualbino kuhakikisha wanaunda vikundi  vya kuweka na kukopa ili waweze  kunufaika na  asilimia mbili (2%) ya mkopo wenye riba nafuu kutoka katika vyanzo vya mapato ya ndani ya Halmashauri kwa ajili ya kujikwamua kiuchumi na kuondokana na umaskini.

Naye Afisa elimu maalum Ndg. Japhary Buya amewahakikishia viongozi wa TAS pamoja na wataalamu kuwa shule ya   msingi  Ushirombo inausalama wa kutosha hivyo wawapeleke watoto  wenye ualbino shuleni kwani kupata elimu ni haki yao. Ndg. Buya alisema "Mpaka sasa tumeishapokea  mafuta,karatasi maalumu za wasioona na mashine za kuandikia maandishi ya wasioona na kofia kwa watoto wenye ualbino kutoka Ofisi ya Rais TAMISEMI". Pia aliendelea kusema kuwa watoto wenye ualbino wanapewa karatasi zenye maandiko makubwa “Enlarged print”  na pia wanapewa muda wa nyongeza vakati wa mitihani kwa ajili ya kuwaboreshea mazingira ya ujifunzaji.

Katika kuhitimisha Kikao hicho  kaimu Mwanasheria wa Halmashauri Ndg Stephano Bugalama  amewaalika viongozi wa TAS kutembelea ofisi ya Mwanasheria wa Halmashauri ili kupewa miongozo  na namna ya kutengeneza Katiba inayozingatia sheria mama ya uundaji vikundi kwa ajili ya kupata fulsa nzuri ya kupata mikopo kama vikundi vingine.

Mwenyekiti wa Chama Cha Watu wenye Ualbino Wilayani Bukombe Bi.Ida Saka akifungua kikao.

Afisa Elimu Maalumu Ndg Japhary Bayu akitoa mada wakati wa kikao mkakati hicho.

Baadhi ya Wajumbe wa Kikao hicho.