VIONGOZI WA DINI BUKOMBE KUSHIRIKI MAPAMBANO DHIDI YA RUSHWA

Imewekwa: July 19th, 2024

Viongozi wa dini katika Halmashauri ya Wilaya ya Bukombe waombwa kushiriki mapambano dhidi ya rushwa kuelekea kwenye kipindi cha uchaguzi wa Serikali za Mitaa 2024 na uchaguzi wa Rais, Wabunge na Madiwani 2025.

Ombi hilo limetolewa na Kamanda wa Taasisi ya Kuzuia na Kupambana na Rushwa ( TAKUKURU)  Wilayani Bukombe Said Mhina katika warsha ya viongozi wa dini kuhusu kudhibiti vitendo vya rushwa kabla, wakati na baada ya uchaguzi.

Akiongea katika kikao hicho Kamanda wa TAKUKURU Wilaya ya Bukombe Said Mhina alisema viongozi wa dini ni wadau muhimu katika kukabiliana na vitendo vya rushwa kwani wana mchango mkubwa katika kujenga maadili sahihi kwa waumini na kuelimisha juu ya vitendo vya rushwa.

Aidha Mhina amewakumbusha Viongozi hao kuwa wana wajibu wa kuishauri Serikali na Tume Huru ya Taifa ya Uchaguzi namna bora ya kukabiliana na vitendo vya rushwa katika Uchaguzi.

Kwa upande wake Afisa wa Kuzuia na Kupambana na Rushwa Bosco Mwidadi amewasihi viongozi hao kuhakikisha wana wahimiza waumini katika kujiandikisha kwenye daftari la Kudumu la Wapiga Kura ili wapate fursa ya kushiriki Uchaguzi.

Vile vile Hamimu wa Msikiti wa Uhamiaji Athumani Musa amesema kuwa viongozi wa dini kwa pamoja tunawajibu wa kutoa maonyo kwa waumini, wagombea na wafuasi ili kujiepusha na vitendo vya rushwa.

Katika Halmashauri ya Wilaya ya Bukombe TAKUKURU imekuwa na utaratibu wa kutoa elimu dhidi ya rushwa ili kuwaepusha watanzania na mkono wa sheria.