Wawezeshaji TASAF wapatiwa mafunzo ya Uhakiki wa kaya kwa kutumia kishikwambi

Imewekwa: July 1st, 2020

Wawezeshaji wa TASAF wamepatiwa mafunzo ya siku mbili ya kipindi cha Pili cha Awamu ya Tatu ya Mfuko wa Maendeleo ya Jamii (TASAF III) kuhusu Uhakiki wa Kaya za Walengwa wa Mpango kwa kutumia kishikwambi ili kuwajengea uelewa wa pamoja wa namna zoezi  la uhakiki wa walengwa litakavyofanyika kwenye ngazi ya Mamlaka ya Eneo la Utekelezaji.

Akisoma hotuba ya ufunguzi  wa mafuzo hayo Afisa Ufuatiliaji TASAF Makao Makuu Moris Momba amesema

“Wakati wa Uzinduzi wa Kipindi hiki cha Pili, Mheshimiwa Rais John Pombe Joseph Magufuli aliagiza  kwamba kabla ya shughuli zozote za Kipindi cha Pili kuanza, uhakiki wa walengwa ufanyike kote nchini ili kuondoa kaya zote za walengwa ambazo zimepoteza sifa”

Momba aliendelea kusema kuwa  Kipindi cha Pili cha Awamu ya Tatu ya Mfuko wa Maendeleo ya Jamii (TASAF III) utekelezaji wake utafanyika  nchini katika maeneo ambayo hayakupata fursa hiyo katika Kipindi cha Kwanza cha utekelezaji wake ambacho kimekamilika.

Aidha amesema mkazo mkubwa katika Kipindi cha Pili utawekwa katika kuwezesha Kaya zitakazoandikishwa kwenye Mpango kufanya kazi ili kuongeza kipato na kitahakikisha kwamba huduma za jamii zinaongezwa na kuboreshwa ili kutoa huduma na kuendeleza rasilimali watoto hususan katika upatikanaji wa elimu na afya. 

Mkurugenzi wa Halmashauri ya Wilaya ya Bukombe Dionis Myinga amewataka wawezeshaji hao kuhakikisha wanakuwa waadilifu wanapokwenda kufanya kazi ya uhakiki wa walengwa baada ya mafunzo hayo.

“Hakikisheni mnakuwa waadilifu mnapokwenda kufanya kazi ya uhakiki na kuhakikisha mnaondoa kaya zote ambazo zimepoteza sifa.”

Speratus Buberwa kwa niaba ya washiriki wa mafunzo hayo alihaidi kufanya kazi ya uhakiki wa kaya za walegwa kwa kufuata miongozo waliyopewa  ili kupata walengwa wenye sifa zilizokusudiwa na mradi.  

Baada ya kukamilika Kipindi cha Kwanza,  Serikali ya Jamhuri ya Muungano wa Tanzania iliamua kuendelea na Kipindi cha Pili katika Awamu ya Tatu ya TASAF  ili kaya zote zinazoishi katika mazingira duni zipate usaidizi wa Serikali kupitia TASAF kwa kuwawezesha kufanya kazi na kupambana na umaskini.

 Afisa Ufuatiliaji TASAF Makao Makuu  Moris Momba akitoa mafunzo ya namna ya kutumia Kishikwambi wakati wa uhakiki wa  Walengwa.

Baadhi ya washiriki wa mafunzo.