WiLDAF Tunaomba mtanue eneo la Mradi

Imewekwa: March 13th, 2021

Katibu Tawala wa Wilaya ya Bukombe Paul Cheyo kwa niaba ya Mkuu wa Wilaya ya Bukombe ameliomba shilika lisilo kiserikali la WiLDAF (Womem in Law and Development in Africa) kuhakikisha linaongeza eneo la mradi kwa maeneo yaliyobakia.

"Tunaomba mtanue eneo la mradi  ili kata zote ziweze kufikiwa na wanawake wa Bukombe waweze kufikia hamsini kwa hamsini katika nafasi za uongozi"

Cheyo ameyasema hayo tarehe 13 Machi, 2021 wakati wa mwendelezo wa maadhimisho ya siku ya Wanawake Duniani Wilayani Bukombe  yaliyofanywa na shirika la WiLDAF kupitia mradi wake wa Wanawake Sasa yenye Kauli Mbiu isemayo "Wanawake katika Uongozi: Chachu Kufikia Dunia yenye Usawa."

Akitoa salamu za ufungunzi wa maadhimisho hayo Afisa Program Mwandamizi Agnes Mtuhi amesema kupitia mradi wa Wanawake Sasa wanawake wengi walijitokeza  kushiriki katika uchaguzi wa mwaka 2020 na kufanikiwa kushika nyadhifa mbalimbali kama ubunge, udiwani na uwakilishi katika mabalaza ya vijiji, kitu ambacho kilikuwa adimu sana kwa miaka ya nyuma.

Aidha aliendelea kusema kuwa ushiriki wa mwanamke katika uongozi unakabiliwa na changamoyo nyingi zikiwemo mila na mtazamo potofu, ukatili wa kijinsia, sheria zenye mapungufu, ukosefu wa fedha, kutojua taratibu za kufuata hasa wakati wa kujiunga na vyama vya siasa na chaguzi ndani ya vyama na jamii kutotoa ushirikiano wa kutosha kwa viongozi wanawake.

Agnes Mtuhi Afisa Program Mwandamizi WiLDAF.

Naye Mratibu wa mradi wa Wanawake  Sasa Wilaya ya Bukombe Mariana Genya amesema mradi wa Wanawake Sasa  umefanikiwa kufikia wadau mbalimbali ambao ni Kikundi cha Mwanamke Sasa wadau wao wakiwa ni AMCOS, Bodaboda na wasaidizi wa sheria, Viongozi wa kimila, Viongozi wa dini, waandishi wa habari na vikundi vya ngoma za asili ambao tuliona wanaweza kutoa nafunzo kwa jamii kuhusu masuala ya kijinsia kupitia sanaa.

Aidha Shirika la WiLDAF kuanzia tarehe 11 - 12 Machi, 2021 lilitoa mafunzo juu ya ukatili dhidi  ya wanawake kwenye siasa kwa kikundi cha Wanawake Sasa pamoja na Wajumbe wa Mkakati wa Kitaifa wa Kutokomeza Ukatili Dhidi ya Wanawake na Watoto ( MTAKUWA) lengo likiwa ni kupata elimu ya kutosha katika maswala ya uongozi na usawa wa kijinsia na kuleta maendeleo yanayozingatia usawa katika jamii ya Bukombe.

Idd Rajabu Mzirai Mwezeshaji wa mafunzo kutoka shirika la WiLDAF akifundisha baadhi ya washiriki wa mafunzo.

Shirika la WiLDAF(Wanawake katika Sheria na Maendeleo Barani Afrika) kupitia Mradi wake wa Wanawake Sasa ulizinduliwa mwaka 2019 Wilayani Bukombe likiwa na lengo la kuongeza ushiriki wa wanawake katika uongozi kupitia uhamasishaji jamii. Mradi huu ilianza na kata 5 ambazo ni Namonge,Uyovu, Bulega, Katente na Bukombe na sasa zimeongeza kata zingine 2 na kupelekea kuwa na jumla ya kata 7 ambazo ni Igulwa na Bulangwa.

Baadhi ya viongozi walioshiriki mwendelezo wa maadhimisho ya siku ya Wanawake Duniani 2021.

Baadhi ya Wanawake walioshiriki Sherehe za maadhimisho ya siku ya Wanawake Duniani.